Takk fyrir frábært mót kæru gestir - uppfært

Þá er Nettómótinu 2013 lokið. Á endanum reyndust keppnisliðin vera 194 og leiknir voru 462 leikir en 1.205 keppendur léku á mótinu, þeir yngstu 5 ára. U.þ.b 1.000 manns gistu í skólamannvirkjum bæjarins og 2.500 gestir heimsóttu Vatnaveröld sem er metfjöldi, enda lék veðrið við hvern sinn fingur þessa helgi.

Frá bæjardyrum okkar mótshaldara séð, gekk mótið algjörlega hnökralaust fyrir sig og keppendur, þjálfarar, liðsstjórar og aðrir forráðamenn voru frábærir gestir alla helgina og leikgleðin var einstök sem fyrr. Hafið þúsund þakkir fyrir komuna og verið velkomin að ári, á Nettómótið 1.-2. mars 2014. 

Mótshaldarar vilja einnig færa öllum félagsmönnum Keflavíkur og Njarðvíkur bestu þakkir fyrir óeigingjarnt framlag þessa helgi í þágu körfunnar og unga fólksins.

Einnig fá öll þau fyrirtæki og stofnanir sem lögðu mótinu lið miklar þakkir. Þar ber sérstaklega að nefna tvo aðila sem eru annars vegar Samkaup, rekstraraðili Nettó, en þeir hafa verið aðal bakhjarl mótsins í áraraðir og hins vegar Reykjanesbær sem styður okkur með margvíslegum hætti við mótshaldið. Fjölmargir aðrir aðilar koma einnig gríðarlega sterkir inn í þetta með okkur og án þeirra væri þetta aldrei sama mótið.

Óskilamunum hefur verið safnað saman í Íþróttahúsinu við Sunnubraut, sími 421 1771

Munið að á annað þúsund myndir af keppendum mótsins verður að finna fljótlega á www.draumalidid.is. Einnig eru komin ljósmyndasöfn á www.vf.is og jafnframt verður í Suðurnesjamagasíni VF sýnt innslag frá mótinu á sjónvarpsstöðinni ÍNN í kvöld.

Barna- og unglingaráð Körfuknattleiksdeilda Keflavíkur og Njarðvíkur

Gististaðir liða eru klárir - Munið að ganga vel um skólana

Hér til hliðar á síðunni undir "Gögn-mótið 2013" má finna pdf skjal sem heitir Gististaðir liða 2013.  Þetta skjal upplýsir ykkur um allt sem viðkemur gistingunni og eru liðstjórar beðnir að kynna sér það vel, kynna sínum liðum það enn betur, prenta að lokum út og taka með sér á mótið.

Í stórum dráttum eru gististaðir liða á eftirfarandi stöðum:

Holtaskóli:

Breiðablik, KFÍ, Kormákur, Þór Akureyri, Sindri, Skallagrímur Valur og Þór Akureyri

Heiðarskóli:

ÍR, KR og Reynir/Víðir

Myllubakkaskóli:

Haukar og Fjölnir

Njarðvíkurskóli:

Ármann, Grindavík og Stjarnan

Íþróttahús Njarðvíkur:

Þór Þorlákshöfn

Björkin (rétt við Njarðvíkurskóla):

Snæfell og Reykdælir

Þegar lið mæta til gistingar eru þau beðin að hafa samband við;

• Hjörvar í síma 692 2726
• Valþór í síma 697 9797

MUNA SVO KÆRU GESTIR:

• Að ganga vel um skólana og þeirra eigur.
• Hafa stofurnar læstar þegar enginn er inni í þeim.
• Virða aðgangsstýringar umsjónarmanna (ekki nota aðra útganga en til er ætlast).
• ATH. að bannað er að leika sér með bolta í skólunum.
• Vera búin að taka föggur sínar úr stofunum og setja fram á gang fyrir lokaathöfn svo hægt sé að byrja að þrífa skólanna.

Leikaniðurröðun lokið, og allt að verða klárt.

Þá er leikjaniðurröðunin tilbúin og komin á síðuna undir, Gögn - mótið 2013. Þar má einnig sjá allar upplýsingar um  keppnisliðin sem eru 196, bíóferðir liða og Tilkynningu til liða þar sem finna má nokkrar hagnýtar upplýsingar fyrir mótið.

Ábending til þeirra sem eiga erfitt með að finna sitt lið í leikjaniðurröðuninni;

• Opna skjalið í Acrobat Reader
• Halda niðri Ctrl takkanum og ýta á F (Ctrl+F)
• Slá inn heiti liðsins og hugbúnaðurinn finnur hvar nafn liðsins kemur fyrir í skjalinu

Nú er m.a. byrjað að skipuleggja gistingar liða í skólum bæjarins. Það skipulag verður sett á heimasíðuna  um leið og það telst fullsmíðað, sem verður líklega ekki fyrr en á föstudag skv. venju.  ATH. að félög þurfa að leggja raunsætt mat á hve margir gista með liðunum, þannig getum við gert ráð fyrir nægjanlegu plássi fyrir liðin.

Það liggur þó fyrir að þau lið sem koma á föstudagskvöldinu munu gista í Holtaskóla við Sunnubraut.

Munið síðan yfirlitskortið í miðju mótsbæklingsins - Það hjálpar ykkur að taka réttar stefnur á alla lykilstaði mótsins :)

ATH. að þeir iðkendur í elsta árgangnum, sem munu m.a leika á stórum velli í Íþróttamiðstöðinni í Garði, er bent á að 10. min akstur er á milli Sunnubrautar og Garðs, en Íþróttamiðstöðin er ca. miðja vegu á hægri hönd þegar keyrt er eftir Garðbrautinni.  Einnig er upplagt fyrir þau lið sem þar leika að prófa góða sundaðstöðu sem þar er. 

Liðin geta pantað skutlu í Garðinn eða hvaða annan leikstað sem er, bara að hringja í 863 0571 eða 863 0572 - Þið hringið - Við sækjum & skutlum - Allt í boði Nettómótsins - Eintómt dekur alla helgina.

Skráningum lokið - Niðurröðun hafin

Lokað hefur verið fyrir frekari skráningar á Nettómótið 2013 og ljóst að um fullbókað mót verður að ræða og rúmlega það. 

Þó 19 félög hafi boðað þáttöku sína, sem er þremur félögum færra en í fyrra, þá eru 194 keppnislið skráð til leiks sem er 6 liða aukning frá metárinu 2011 þegar 188 lið voru skráð til leiks. Það stefnir því í að liðlega 1.200 börn verði mætt geislandi af orku og gleði í íþróttasali Reykjanesbæjar um n.k. helgi þar sem besta hátíð landsins þá helgina mun fara fram.

Liðin sem hafa boðað komu sína á Nettómótið 2013 eru:

Ármann, Breiðablik, Fjölnir, Grindavík, Haukar, ÍR, Keflavík, KFÍ, Kormákur, KR, Njarðvík, Reykdælir, Reynir, Skallagrímur, Snæfell, Stjarnan, Valur, Þór Akureyri, og Þór Þorlákshöfn.

LOKADAGUR skráningar er í dag........

Skráningu á Nettómótið 2013 lýkur í kvöld kl. 22.00. Í kjölfarið tekur hinn þrautreyndi púslari Falur Harðarson til óspilltra málanna við að raða niður á fimmtahundrað leikjum, þar sem allt þarf að falla sem flís við rass við heildardagskrá mótsins.

Undirbúningur er annars í föstum skorðum enda margir lykilstarfsmenn mótsins búnir að vinna við það í áraraðir. Það verður þó að segjast að við erum komin með fiðring erum farin að hlakka mikið til mótahaldsins. 

Ungir iðkendur heimaliðanna eru einnig orðnir vel spenntir, búnir að mæta vel á æfingar og farnir að telja niður dagana.

Fleiri fréttir fljótlega...............

Skráning opnar n.k föstudag, 8. febrúar

Opnað verður fyrir skráningar föstudaginn 8. febrúar og síðasta tækifæri þjálfara/forráðamanna félags til að skrá lið til keppni er á miðnætti föstudaginn 22. febrúar.

Skráningarblað með öllum helstu upplýsingum verður sent að venju á þjálfara/forráðamenn félaganna með tölvupósti miðvikudaginn 6. febrúar. Bæklingur mótsins og skráningarblað verður einnig aðgengilegt á heimasíðunni frá og með sama degi.

Bæklingur mótsins mun síðan fara í dreifingu föstudaginn 8. feb. þannig að flestir ættu að hafa fengið hann í hendurnar um eða rétt eftir helgina. 

Frekari upplýsingar fara í loftið um leið og ástæða þykir til.

 

Nettómótið 2.-3. mars 2013 - undirbúningur hafinn

Kæru körfuboltaunnendur

Undirbúningur fyrir Nettómótið 2013 er kominn á fullt og verður mótið með sömu gæðum og áður. Mótsbæklingurinn fer í dreifingu upp úr 8. febrúar og verða öll félög væntanlega komin með hann í hendurnar í s.l. 12. febrúar.

Fylgist síðan með hér á bloggsíðu mótsins -  Frekari upplýsingar verða settar inn um leið og þær liggja fyrir.

Allt rúllar og börnin brosa út að eyrum

Blíðskaparveður hefur verið í Reykjanesbæ í allan dag og hefur Nettómótið hefur rúllað af mikilli mýkt í takti við sólsátta veðurguði.

Börnin njóta sín vel á mótinu og hafa jafnvel brugðið sér í körfu utandyra í einstaka pásum.  Pislahöfundi þótti skondið að heyra einn Fjölnispeyjann spyrja þjálfara sinn áðan, hvort hann fengi ekki að vera með tveimur nafngreindum félögum sínum í liði á Nettómótinu næsta ár. Hann var greinilega ekki í vafa hvort hann myndi mæta aftur að ári.

Í hádeginu fengu allir körfuboltapastasúpu, brauð og ávexti við góðar undirtektir. Nú fer að líða að kjötbollunum sem byrja að poppa ofan í liðið kl. 18.00 en leikjum dagsins lýkur kl. 19.30.

Eina sem hefur skyggt á veðursælan dag er áhlaup sem laganna verðir gerðu á bílastæði við íþróttahúsin í dag, en talsverður fjöldi gesti fékk sekt fyrir að leggja ólöglega, og þykir okkur mótshöldurum það miður og könnumst ekki við slíkt átak áður á Nettómóti. Greinilega lengi von á einum.

Við viljum biðja gesti að huga vel að því að legga löglega framan við íþróttamannvirkin og bendum fólki jafnframt á bílastæðin ofan við Fjölbrautarskólann og neðan við Vatnaveröld - Sundmiðstöð.

Gististaðir liða

Gististaðir liða verða á eftirtöldum stöðum;

Holtaskóli:

KFÍ, Kormákur, Þór Akureyri, Snæfell, Skallagrímur, Ármann, Höttur og Sindri

Heiðarskóli:

Haukar og KR

Myllubakkaskóli:

Stjarnan og Grindavík

Njarðvíkurskóli:

UMF. Hekla, Hörður, Fjölnir, Breiðablik, Valur og ÍR

Íþróttahús Njarðvíkur:

Þór Þorlákshöfn

Þegar lið mæta til gistingar eru þau beðin að hafa samband við;

• Hjörvar í síma 692 2726
• Tryggva í síma 617 8931.

MUNA SVO KÆRU GESTIR:

• Að ganga vel um eigur skólanna.
• Hafa stofurnar læstar þegar enginn er inni í þeim.
• Virða aðgangsstýringar umsjónarmanna (ekki nota aðra útganga en til er ætlast).
• Vera búin að taka föggur sínar úr stofunum og setja fram á gang fyrir lokaathöfn svo hægt sé að byrja að þrífa skólanna.

Leikjaniðurröðun - UPPFÆRT

Því miður þurfti að gera smávægilegar breytingar á leikjaniðurröðun og hefur hún áhrif á eftirfarandi stúlknalið;

Keppnislið - Kyn - Árgangur

Fjölnir 14 - ste - 2000

Fjölnir 19 - ste - 2004

Grindavík 7 - ste - 2000

Haukar 10 - ste - 2000

Keflavík 12 - ste - 2000

KR 12 - ste - 2000

Njarðvík 15 - ste 2004

Njarðvík 8 - ste - 2000

Skallagrímur 7 - ste - 2000

Stjarnan 15 - ste - 2000

Valur 5 - ste - 2000