Nettómótið 3.-4. mars 2012 - undirbúningur hafinn

Kæru vinir & körfuboltaunnendur

Undirbúningur fyrir Nettómótið 2012 er kominn á fullt og verður mótið með sömu gæðum og áður. Mótsbæklingurinn fer í dreifingu 8. febrúar og verða öll félög væntanlega komin með hann í hendurnar í s.l. 12. febrúar.

Fylgist síðan með hér á bloggsíðu mótsins -  Frekari upplýsingar verða settar inn um leið og þær liggja fyrir.

Þakkir í mótslok

Þá er Nettómótinu 2011 lokið. Á endanum reyndust keppnisliðin vera 188 og leiknir voru 447 leikir en um 1.200 keppendur léku á mótinu, þeir yngstu 5 ára og ljóst er að þetta er fjölmennasta körfuboltamót sem haldið hefur verið á landinu til þessa. Alls gistu rúmlega 1.000 manns í skólamannvirkjum bæjarins sem var talsvert meiri fjöldi en við höfðum búið okkur undir. Allir fengu þó sinn svefnstað og sváfu bara nokkuð vel.

Heimasíðan lagðist í dvala um mitt mótið þar sem vefstjóri síðunnar og einn af framkvæmdastjórum mótsins var fluttur í botnlangauppskurð þegar leikar stóðu sem hæst.  Af þeim sökum var ekki meira um fréttaflutning af mótinu fyrr en þessi orð eru skrifuð af sama aðila, bara heldur hressari en á laugardagskvöldinu.

Segja má að mótið hafi allt gengið samkvæmt áætlun þó alltaf komi upp óvænt verkefni sem þarf að leysa með hraði og flest eru þau þess eðlis að mótsgestir hafa enga hugmynd um hverju er verið að redda á bak við tjöldin. Annað árið í röð reynist fjöldi keppenda umtalsvert meiri en við höfðum búið okkur undir en þrátt fyrir það stóðust allar okkar tímaáætlanir. Þessi fjöldi sem er farinn að sækja mótið heim kallar þó óhjákvæmilega á endurskoðun ákveðinna þátta og höfum við skipuleggjendur mótsins þegar fengið nokkrar hugmyndir sem munu koma til framkvæmda fyrir næsta mót og verða til bæta gott mót enn frekar. 

Mótshaldarar vilja að lokum þakka öllum keppendum, þjálfurum, foreldrum og forráðarmönnum fyrir frábæra frammistöðu og leikgleði um helgina. Einnig viljum við færa öllum okkar félagsmönnum, sem lögðu hönd á plóginn við þrotlausa vinnu þessa helgi, okkar bestu þakkir fyrir óeigingjarnt framlag í þágu körfunnar og unga fólksins. Síðast en ekki síst fá öll þau fyrirtæki og stofnanir sem lagt hafa mótinu lið okkur bestu þakkir. Þar ber sérstaklega að nefna tvo aðila sem eru annars vegar Samkaup, rekstraraðili Nettóbúðanna, en þeir hafa verið aðal bakhjarl mótsins í áraraðir og hins vegar Reykjanesbæ sem styður okkur með margvíslegum hætti við mótshaldið.

Óskilamunum hefur verið safnað saman í Íþróttahúsinu við Sunnubraut, sími 421 1771

Þúsund þakkir til ykkar allra og vonandi sjáumst við sem flest aftur á Nettómótinu 3.-4. mars 2012.

Barna- og unglingaráð Keflavíkur og Njarðvíkur

Mótið rúllar og allt hefur gengið vel

Þrátt fyrir sunnan slagveður í Reykjanesbæ í dag hafa keppendur á Nettómótinu 2011 haldið sínu striki enda fer mótið allt fram innanhúss. M.a. brotnaði öflug fánastöng á lóðinni hjá Heiðarskóla sem lýsir ágætlega hversu hressilega veðurguðirnir blésu í dag. Í þessum töluðu orðum er veðrið farið að ganga talsvert niður og tappi hefur verið settur í mest alla úrkomu.

U.þ.b. 1.200 keppendur eru á mótinu og fjöldinn allur af aðstandendum. Allt hefur gengið upp þó auðvitað komi upp eitt og eitt verkefni sem þarf að leysa með bros á vör.  Tekist hefur að koma 1.000 gestum í gistingu sem fer fram á 7 stöðum í bæjarfélaginu. Leikið verður á öllum völlum til 19.30 í kvöld og ekkert gefið eftir. Kvöldvakan hefst síðan kl. 20.30. 

Þá er allt að verða klárt - Nokkrir tímar í mót

Gististaði liða má sjá hér á síðunni til hliðar undir Gögn - mótið 2011. Nú þegar eru fjölmörg lið mætt á staðinn og húsin eru klár fyrir fjörið.  Þau lið sem eiga leiki snemma mæta bara beint í þá og sinna málum eins og skráningu þegar um hægist. 

ATH. að móttaka liða er í Íþróttahúsinu við Sunnubraut.  Liðin geta einnig farið beint á gististaði og losað þar farangur, allar stofur eru merktar viðkomandi liðum.

Við viljum ítreka það við okkar velkomnu gesti að ganga vel um skólana og skilja við þá í mótslok eins og komið er að þeim. Þetta er okkur afar mikilvægt.

Velkomin á Nettómótið 2011 og eigið ánægjulega helgi.

Gististaðir liða

Gististaðir liða munu liggja fyrir seinni partinn á morgun, föstudag. Enn á eftir að hnýta nokkra lausa enda saman til að takist að hýsa alla, en það verkefni verður leyst eins og önnur sem upp koma. Við höfum lagt áherslu á það við liðin sem eru að koma að þau gefi okkur upp sem nákvæmastar tölur yfir þá sem ætla að gista. Þetta er afar mikilvægt svo rýmisáætlanir okkar standist, sérstaklega hafa tölur yfir foreldra sem gista stundum verið vanáætlaðar. Samkvæmt þeim tölum sem við höfum í höndunum nú eigum við von á 1.000 næturgestum í skólamannvirki bæjarins. Það er því líklegt að við þurfum að bæta við 6.gististaðnum þar sem fyrri áætlanir gerðu ráð fyrir 800 næturgestum. Þetta skýrist þó betur á morgun sem fyrr segir. Þau lið sem koma á föstudagskvöld og gista tvær nætur munu gista í Holtaskóla við Sunnubraut og geta komið beint þangað við komuna til Reykjanesbæjar.

Tilkynning fyrir mót

Hér á hægri hlið síðunnar undir hlekknum, Gögn - mótið 2011 hefur verið sett inn nýtt skjal sem heitir Tilkynning fyrir mót 2011.

Vinsamlegast kynnið ykkur skjalið en í því eru frekari upplýsingar um eitt og annað viðkomandi mótinu sem nauðsynlegt er að vita. Þetta er þó hluti af þeim gögnum sem forráðamenn liðanna fá send með tölvupósti og við innritun.

Leikjaniðurröðun og fleiri upplýsingar

Komnar eru upplýsingar á heimasíðuna um keppnisliðin og leikjaniðurröðun á Nettómótinu 2011.  Þessi gögn liggja hér á hægri hlið síðunnar undir hlekknum, Gögn - mótið 2011. 

Líkt og ávallt vonum við að ekki komi til breytinga á leikjaniðurröðun mótsins en við skulum bíða og sjá til þar sem hættan á breytingum eykst í hlutfalli við fjölda skráðra keppnisliða.

Þar sem fyrirhugaður tímarammi mótsins heldur ekki vegna gríðarlegrar þátttöku liggja eftirfarandi breytingar fyrir:

• Við hefjum keppni kl. 08.00 báða dagana
• Keppni lýkur kl. 15.00 á sunnudegi
• Verðlaunaafhending og mótsslit hefjast kl. 15.30
• Bíósýningarnar verða 12 í ár.

Við munum halda áfram að birta upplýsingar á heimasíðunni í aðdraganda mótsins - Fylgist því vel með.

Skráningum lokið - þátttakan nær nýjum hæðum

Lokað hefur verið fyrir frekari skráningar á Nettómótið 2011. Ljóst er að nýtt þátttökumet verður slegið enn eina ferðina en alls hafa 190 keppnislið verið skráð til leiks frá 24 félögum. Til samanburðar má geta þess að 148 keppnislið léku á mótinu í fyrra þannig að aukningin er heil 25%.

Það liggur fyrir að þessi fjölgun mun hafa einhver áhrif á tímasetningar mótsins og munum við kynna allar slíkar breytingar um leið og þær liggja fyrir.

Félögin sem taka þátt í ár eru eftirfarandi:

Ármann, Breiðablik, Fjölnir, FSu, Grindavík, Haukar, Hörður, Höttur, ÍA, ÍR, Keflavík, KFÍ, Kormákur, KR, Njarðvík, Sindri, Skallagrímur, Snæfell, Stjarnan, Tindastóll, UMF Hekla, Valur, Þór Akureyri, og Þór Þorlákshöfn.

"Nett stemming" í loftinu

Nú þegar lokaskil á skráningum eru að renna í hlað er ekki laust við að okkur sem berum ábyrgð á mótinu, bregði örlítið í brún..........það virðist sem 95% af öllum dripplandi börnum á Íslandi ætli á Nettómótið 2011. Í það minnsta hafa lið frá 24 félögum skráð sig til leiks sem er bara "Nett stemming" og Íslandsmet í körfuboltaheimi unga fólksins.

Það er gleðiefni að þátttakan verði svona góð og ekki síst hvað landsbyggðaliðin eru að koma sterk inn. Vissulega setur svona mögnuð þátttaka alla skipulagningu í örlítið uppnám, en það verður þó leyst með ábyrgum hætti án þess að ganga á dagskrá mótsins, annað kemur ekki til greina.  Þetta gæti þó t.d. þýtt það að mótinu verði slitið klukkutíma seinna en áætlað var en það skýrist nú fyrst fyrir alvöru eftir helgi.

Fylgist með heimasíðunni, við komum með frekari upplýsingar fljótlega............................

Bæklingurinn farinn í dreifingu og gögn komin á netið

Öll félög ættu að vera komin með 28 síðna kynningarbækling mótsins í hendurnar í síðasta lagi mánudagínn 14. febrúar en flest félög hafa þegar fengið hann í hendurnar. 

Hann liggur einnig hér á heimasíðu mótsins ásamt auglýsingaplagati og skjali sem heitir "Skráning á mótið 2011", en það skjal er einnig sent með tölvupósti á alla tengiliði félaganna.

Einnig höfum við sett inn kynningarmyndband þar sem sjá má skemmtileg myndbrot frá afmælismótinu 2010. Við munum sýna meira af skemmtilegum myndskeiðum á n.k. Nettómómóti.

Öll þessi gögn liggja hér til hliðar á síðunni undir hlekknum, TENGLAR, Gögn - mótið 2011.